飛鷹餐廳

金鳳就食得多, 飛鷹都係第一次去食咋! 尋晚八條腿去左呢間飛鷹餐廳試一試,
究竟鳳好定鷹好呢?
相片就影得唔好喇! 因為個電話影唔到近野, 文字講解番啦!

門口無乜特別, 一般茶餐廳, 同金鳳無乜分別.
入內都係好細, 兩邊四人架位, 中間都四人方桌.

你睇, 我地好似食緊聖誕餐敢
我地叫左四個餐交換食, 先黎個餐飽!

個餐飽好大個, 兩個人一個都得, 仲係好熱好軟呀!

呢個白湯, 外表好似水左d, 但都有肉碎, 好有味!

紅湯都幾好, 有菜食, 唔會咁多辣油!

呢個德國咸豬手, 唔係成隻上的, 切左件碟上.
不過大家都覺得佢太豬味, 有人只係食左一口咋!
除左好豬味外, 無乜其他味. 可以不理!
除非你鐘意勁豬味!

近既係肉眼扒, 肉質比較厚但入口好軟, 配左黑椒汁, 正!
遠既係西冷扒, 原本叫左紐西蘭, 點知佢拿左個西冷.
好彩都好入味, 比另一個黑椒更濃. 但肉質就無肉眼咁軟, 而且薄d架!
兩個牛扒都係六成熟, 但我覺得幾好, 唔係太多血架咋!
你知通常d廚師都會煮熟d架啦!

呢個蒜茸雞扒又有個意外既驚喜喎!
雞扒煎脆個皮, 配埋d蒜茸汁好正! 好香!

熱飲同凍飲都唔駛加錢, 果杯凍飲比金鳳大,
杯檸檬茶唔駛叫小甜都得!

食完後, 大家都話有多個地方食扒喇!