萬聖節快樂2008

                   祝各位萬聖節快樂呀！                  

我就慘了！呢兩個星期都係加班！加班！再加班！無得去玩喇！

休息？無休息！

上兩個星期仲等閒，我就整左呢個生日蛋糕比瑤媽，藍莓芝士凍餅！
特別整左Ｄ啫喱可以比瑤瑤食！

呢個星期就忙！忙！忙！成個星期我都在公司加班, 係敢趕! 係敢做! 上星期阿爸生日, 尋日就媽咪生日都無整蛋糕, 但家姐有贈卷, 我就取了呢兩個蛋糕喇! 係Conrad酒店既, 標準蛋糕得六吋架咋! 好彩有兩個!

黑森林蛋糕
d生果浸左酒, 但d酒有些苦, 加上厚厚既忌廉
我食左一啖就無食喇!

硬芝士蛋糕
其實New York Cheese差不多, 所以我食左好多, 差不多四分一, 哈哈!

星期日真係想抖番下，但突然間諗到我仲欠人Ｄ野喎！於是......
因為之前屋企裝修，碰正賓妮小姐既生日，家陣後補番個朱古力芝士蛋糕比佢！
總係尋晚外賣到佢屋企，掛住影相，個蛋糕都有Ｄ溶。

我諗都還完債了，只淨番小吉個生日蛋糕者！
好！等我諗諗先！

希望快Ｄ過埋今個星期啦！我就可以休息了！
 

南生圍-周圍影1

星期天，天晴！我同小吉食飽飽早餐之後向元朗出發，今次周圍行既地方係南生圍，呢度仲係一個拍友既熱門地方，我地可以影餐飽添呀！加上依家有西鐵真係十分之方便！

我地搭西鐵在元朗站下車，之後就開始行入去南生圍了。落左天橋後向元朗舊墟路而行，再經山貝路，之後就到搭橫水渡既入口，附近有公廁大家仲可以方便埋先入去添！

未過橫水渡前，我地梗係開始周圍影啦！有個人仲好有詩意係度畫畫添！
嘩！好短程既橫水渡但都要收$5蚊呀！真係好貴呀！扒幾下就到對面，真係好搵笨呀！不如我比$5蚊佢，佢比我自己扒去對面就好喇！

呢度有幾間士多店鋪有得食野同買野的，所以午餐唔成問題架！不過我地都帶左小小野食黎！

途中有好多拍友，佢地都係一班人黎影相的，但有些人就好無禮貌囉！有兩位女子唔理人係度影緊相，自己成個人攝左入我鏡頭，真係好差囉！另外有一對新人爬上樹度影結婚相添！真係有Ｄ唔明點解要爬上樹度影結婚相呢？

好喇！大家睇睇我周圍影左Ｄ乜？有邊張你鍾意架呢？

3

呢Ｄ都係用數碼機影的，好似欠左Ｄ立體感！
果日我都拎左部舊既135菲林機去影，好開心呀！
係用手動對焦，拉菲林果種！聽到拉菲林既聲！好有手感！
小吉幫我影左幾張相，佢話好大壓力！
之後用番數碼就話....唔！同菲林機個感覺好唔同！
哈哈！緊係啦！儲錢買機啦！
等.......我得閒曬左出黎Scan比大家睇下啦！