五十六天後~回家了！

經過一位姑娘既幫忙找來另一位醫生幫我爸簽名出院，328我爸終於可以出院了。我同媽咪一早就去醫院接佢，點知佢第一眼居然係一個不滿既表情。佢話點解咁遲先黎？我就解釋姑娘叫我九點半黎架！依家九點三咋喎！佢望一望個鐘，之後先話：係咩！我唔知呀！我以為你地七八點就黎喇！之後就笑嘻嘻敢！真係成個細路一樣。

雖然有Ｄ野佢仲未記得番，好似寫字敢。比佢路住佢就識寫，但憑空叫佢寫佢又唔記得。但我地在回家既途中佢知道好快到，因為見到個商場。我同媽咪聽到都好意外喎！真係要比個叻佢先！

番到屋企第一件都就係沖涼喇！洗哂Ｄ衰氣！之後食左小小野就同媽咪行公園，行完後就食午飯，食飽飽後就來一個小睡。

屋企人放左工後都番哂黎！我爸見到個仔又話要同佢行下，點知行行下我哥見佢頭髮都長了，就帶佢去剪頭髮。但係我爸見到間舖居然話唔去，之後帶左我哥去另一間，佢又真係記得喎！剪髮果個人都話佢咁耐無黎剪喎！比多一個叻佢喇！

回家後我地就叫佢同Ｄ孫打麻雀，因為之前佢係醫院度都唔識得打，又話人土也慢，打一隻牌都要兩個字，所以唔同人地打。今次我地就試下佢，佢又真係識得下，記到下喎！疊牌又得，又知果隻係花，識得上牌，重要數下個孫夠唔夠牌。我諗佢都記得下既！又要比多一個叻佢喇！但打左一舖就唔打了，話想訓一陣。

見佢成個人都好似好清醒！好精神！一日都行左三四次，雖然唔係行好多路，但最緊要係佢自己想行。希望佢回家後可以幫到佢記得番多Ｄ以前既事啦！行得好Ｄ啦！不過佢有時仲係叫錯我做媽咪呀！哈哈哈哈！努力加油呀！

黃大仙醫院~醫生

我爸成功地除左條尿喉，自己去到小便喇！真係鬆一口氣呀！
我同家姐都商量過可以接佢出院，點知個姑娘話醫生放左假，下星期先番！
我家姐就留口信問個暫代醫生我爸可唔可以出院？
點知呢個暫代醫生居然話：我暫代架咋！做唔到主意架喎！
我又唔知你爸個情況，又唔知佢又有成緊乜藥？
等佢主診醫生番來先。

果個主診醫生放一個月假，敢咪要等一個月先走得？
好彩佢話下星期二先番者！
乜都話唔知，唔知咪去睇下囉！仲話自己好忙架！
咁忙唔好做喇！番屋企訓喇！真係不知所謂！乜都話唔知，唔關佢事。
黃大仙醫院呢度得一個醫生去睇所有中風者！簡直係踢一踢, 郁一郁！
剛中風者就要把握頭六個月既黃金康復期，正所謂你急佢唔急！
大家都係買定保險，有乜事睇私家都唔駛咁嘔心！
我對呢間醫院既做事方法完全失望！

五十天後

第五十二天
今朝我爸會試除尿喉，大家都好擔心佢自己去唔去到小便。
若果唔得，大家心情又會失落番，我最擔心都係爸媽既情緒。
我爸一直都諗：我乜事都無架！除左條喉就可以回家！
今日又令我好擔心！希望事事順利！
唔好再循環在同一個問題上，醫中風變左醫尿道？

四十五天後

尋晚驗尿報告番左，又驗到有菌。
我爸聽到之後好唔開心而且激動到哭了，這意味著唔可以除尿喉。
家姐都努力解釋比佢聽，但佢依然覺得搞乜都無用，一次又一次都唔除得。
因為我爸覺得除左條尿喉就乜野都無問題，現在又要食五日藥去殺菌。
我都知道我爸好無奈！好唔開心！又要再等！
之後回家我又要向媽咪解釋，佢又係好激動，十萬個點解？
我只可以講插尿喉係好容易感染到菌的，
現在驗到有菌就要食藥，所以唔可以除喉住。
呢一個解釋我都講左幾百次，只係為左佢地安心！
我自己心裡都好難受，十萬個他媽的！可以點樣呢？
媽咪近日話有些頭脹脹，可能佢係無覺好訓，
又諗呢樣又諗果樣，點樣佢先可以訓得著呢？真係擔心佢既身體呀！

我病了!

上星期六我姑姐從鄉下來探我爸, 佢好精靈敢認到她, 仲講番好多野. 我就用我從超人剛學既腳底按摩幫佢按腳, 我覺得我都按到七八成架! 在心情開心既時候, 我同小吉就提意在醫院附近既元氣食壽司. 點知星期日既早上四點幾開心肚疴, 之後以為食左d五寶丸就無事, 結果整日都在疴左十幾次, 無野食都要疴水, 手腳都無力. 雖然今日好d, 有番d精神, 但現在都要去睇醫生了.

四十天後

上星期五開始，我爸既小便又唔得清了，我地又擔心佢既尿道有細菌？於是姑娘又拎左Ｄ去驗。

到星期日佢更有赤赤痛添！成日都以為要去大便，幫佢坐左係度又話無。又除又著，搞到我向佢發左一次脾氣。我大聲地叫佢：唔准呀！講完之後，我又死死氣比佢再坐多次。我已解釋過係小便時先令佢赤赤痛，幾個字又痛一次。我都知佢好辛苦，但又幫唔到佢，只可以叫姑娘留意下。佢地話要醫生先可以比藥佢食，我只好叫佢留說話比醫生知。

後來我爸就話倦叫我回家先，佢話自己試下抖下。我就走左了。我都估佢會靜雞雞落地坐廁所，點知果晚佢真係偷偷落地，幸好無跌到。第二日仲話比我媽聽，呃我話要訓覺，唔想我在等佢去廁所而遲走。呢一番話真係估佢唔到，唔知好嬲定好笑！

星期一開始佢既小便又無端端清左，尋日又拎左Ｄ去驗，睇下有冇菌。
我都唔明尋日知道星期五既小便結果有菌，點解又唔比藥？（雖然依家既尿係清）點解佢地做野要咁慢？等得黎又過幾日！我都唔知個醫生和姑娘想拖到幾時？

三十天後

上次我爸發燒後退左燒，但過了幾日又再發，結果要插‘豆豆‘。即係幫佢插左支針在手背，用膠紙貼住，方便佢地幫佢打針落血管，Ｄ藥快Ｄ有效，亦因為敢我爸叫痛到死！打左五日一個療程。星期一終於幫佢除左個豆豆了，我爸就可以在下午做番針灸。

星期三佢針完灸後在走廊休息時，佢又鬧情緒了。佢話：點解咁耐都唔得架？我乜野都無事喎！淨係個尿喉者！搞左咁耐乜都唔得，我跳樓死左去算了。我媽同大家姐聽到都好驚好難過，只好安慰下佢，唔可以心急架！之後解釋完一輪，情緒都穩定Ｄ！大家都好擔心，尋晚我地就再問姑娘幾時可以幫佢除左條尿尿喉？姑娘就話之前Ｄ報告都番左，今日就問醫生，可以的話就星期一幫佢試試！

其實發燒都係因為佢插住尿喉，而尿喉容易有細菌，所以真係好想佢可以唔駛再插尿喉。現在聽到佢話發燒都會好驚！希望佢可以叻Ｄ自己可以去到小便啦！