人物：小雲，小吉，太子威，型姐，驚青，幫尼。
今次大部既食物之前都準備好哂！因為我地要爭取時間去玩一樣從未玩過既野，就係摸蜆喇！從網上得知好多人都去過水口摸蜆，所以今次就帶大家去摸蜆先。
由塘福行去水口都要廿五分鐘左右，去到球場時就隔離小路落灘，但小心唔好入左地盤喎！因為小妹我一人興高采烈敢跳住入去.......點知不足三步就有幾隻狗即係走出黎！真係比佢地嚇死呀！我仲要扮到都好鎮定敢，立即另番轉頭不敢回望佢地。之後好彩其他人都行到黎，個幾隻狗見到咁多人都不斷叫，我地只好出番去在球場既另一邊落灘。
一落到灘真係好開心呀！雖然未知摸唔摸到蜆，但見到好大個灘呀！有人已經在摸蜆喇！佢地都有幾隻大蜆，我地都行都急不及待開始試下先！好彩小吉拿左幾個小盆蓋來掘，否則就要用手喇！
大家都開始掘，真的有架！但係都係細既蜆仔，都唔係網上見到人地那些又大又靚既？過了一陣終於都掘到隻大架啦！好開心呀！之後個個都努力掘，一有大既蜆時
我地又大叫，真係搞到個灘好鬼熱鬧敢喎！之後小吉又大叫喇！點知原來真係好鬼死大隻呀！仲係我地五人之中最大既一隻添！好勁呀！但點解六個人去得五個人
掘？因為太子威幫我地影相喎！(係懶至真！)
開始掘喇！
個個都有收穫！
人地有專業用具！我地就只有一個小盆蓋！
到左六點左右，大家都倦喇！我地就拿起我地既戰利品回去了。好開心呀！今晚燒野食有得加餸，就係燒大蜆喇！
七點半左右開始燒野食了，真開心！今次有好多野食架！除左菇類同菜，有包心芝士丸，墨丸，獅子狗魚蛋，黑椒牛根丸，八爪魚丸，包心蟹子丸，龍蝦丸，炸魚蛋，
白魚旦，金沙骨，咖喱魷魚，芝士腸，司華力腸，鮮粟米，鱈魚豆腐，魚片角，仲有靚靚既牛扒，香草黑椒羊扒仲要加薄荷香草醬，雞翼二食有青檸蒜茸和香草黑
椒。海鮮有好大隻既大蝦，超大既鮮帶子，花甲，青口，唔少得就梗係我地摸既大蜆啦！仲有燒魷魚添！真係好大食，超跨張呀！最後大家估下我地燒到幾多點？
有咁多美食大家都燒到太開心了，我地忘記左Ｄ粟米同菜，結果.....燒到黑哂！食到飽哂！淨番少少丸和腸，仲有Ｄ細蜆未食過添！只好留番明早做早餐。
之後仲未訓得住，要輪流沖涼嘛！呢個梗係玩遊戲既時間啦！
輸左就要貼上一個貼紙，你睇呢幾個人係大輸家！
點解少左一個人既？因為佢無輸到！
之後仲有個超大大既西瓜做甜品添！連綠豆沙都唔駛煲了，大家飽到上心口了！
真係食到盡！玩到到盡！
都已經四點了，驚青帶左套戲黎睇番套子夜早場，仲係鬼片！大家都準備好哂坐好等去片，點知......睇左個開場不久，唔知係咪比套Ｄ聲音嚇到呢！有人又話睇完到成六點，訓得一陣又起身，有人又話不如訓醒先睇，最後開場不久就散場了。但最搞笑係第二朝在食早餐時又開番呢套戲黎睇，個個又係度話，呢Ｄ叫做鬼片？咁鬼渣架！但老實講，呢套港產鬼片真係得啖笑乍！
第二朝我地食早餐外加左一味香蒜啤酒煮蜆，就係我地摸番黎既細蜆，只係煮左一半乍！因為怕食唔哂！但煮左出黎之後，個個都話煮埋個半都得啦！個個真係.....識食！
初試煮呢個香蒜啤酒煮蜆，真係幾好味架！
好想添食！交左屋後我地就行去長沙放風箏，但泳灘唔比放，我地行左去沙灘另外一邊放，點知又個救生員又唔比放，真係搞錯呀！都遠離游水好遠啦！又話比人投訢就唔好啦！搞到無哂mood，加上唔夠大風起唔到。最後大家只好玩飛碟。
唔夠大風起唔到！
行到另一邊灘都一樣！點解我同小吉個post一樣既？
飛碟呢樣野都幾好玩架！可能訓練到我地既眼界，同閃避既反應。之後仲引左兩隻狗黎玩添！個隻狗叫Cha Cha好鬼醒目同有性格架！原本我地在飛出隻飛碟，隻狗就去追，之後等你再飛隻飛碟時先再跑去另一邊架嘛！點知隻狗玩左幾次後，佢竟然咬起隻飛碟想跑出去沙灘喎！好似要我地追出去拿番敢，真係好醒呀！好彩佢既小主人幫我地取番，但佢好醒目在小吉和太子威身邊周圍行唔走，好似嗅到在佢地度，但又見唔到。個女主人走到黎拉佢走佢都唔走，好搞笑！最型就係我地聽到隻狗海邊叫，仲以為做乜添！原來佢對住個女主人大叫，係度視意佢唔走，但個女主人就唔理佢走左了。睇完呢場show後再玩左一陣飛碟就搭番車到東涌走了。
