劉德華Wonderful World演唱會2007

廿六日走左去睇劉德華演唱會, 但我今次唔係買四佰貴飛呀! 就在搖遠的距離支持佢咋! 雖然遠但睇得好開心呀! 新城仲頒左五個獎比佢添!

一開始個放電真係好激! 好似日本超人片敢, 放d死光打人敢, 好采做足安全設施有驚無險! 華仔係第一個華人同藝人做呢項表演呀! 今次佢仲成日站在高台上, 真的有些擔心!  有一幕華仔仲要比布捉住手腳拍到落張膠布上, 好心痛呀!

我比較喜歡佢重溫唱番舊歌, 因為識唱嘛! 哈哈! 今次又同黃蕊跳舞個段又好精彩呀! 比之前更好! 最後個段有兩隻公仔(Ada同黑仔)出場, 佢地好搞笑, 特別係隻黑仔, 佢好enjoy呢part敢, 著住呢個公仔衫重要不停敢跳舞, 又做左個斜身既動作, 真佩服呢位dancer!

成個演唱會最其怪係中場唱完隻歌後好似完場敢, 熄哂燈, 唔係嘛! 搞錯有人叫安歌添! 睇下個錶十點半左右咋喎! 敢樣黎搞氣氛? d人個個去哂廁所, 呢個係咪去廁所時間呀? 編排真係失敗!

另外最唔開心係在握手時佢被d女fans抓到, 仲大特寫左比我地睇, 真係好多爪印呀! 仲係見紅色添! 真係心痛呀! 太過份喇! 點解d人敢架! 佢最後叫d女仔唔該剪指甲先握手, 唉! 真係.....!!

獅子會自然教育中心

星期日出左camp後由西貢市中心行左去獅子會自然教育中心 Lion's Nature Education Centre.。內面好大分左好多部份，有好多唔同種類既樹木，花，蔬菜等。另外有幾個不同既小型展館，如昆蟲館，貝殼館等。內面仲有一條蕉坑自然教育徑，但好細的，途經有分岔路上昆蟲館。但我覺得呢條教育徑真係要教育下Ｄ人，帶狗行時唔該唔好周圍開大小囉！

呢度都係假日一個好去處的，影左唔少相片添！但不能放太多，有限額限制，所以選左以下二十張相。比些意見啦！

小男人週記舞台劇 Kiss me goodbye 2008

終於在十六日星期日晚睇左小男人週記 http://hk.myblog.yahoo.com/egg1127
感覺真係有好有唔好囉！


一）個場地真係...死火！真係唔可以用黎睇show架！最前叫做Section1由門口方向1號位，分左五個區，我係Section1但第二個區既第五
行，都要係台既小側面，點解我咁早訂飛都會比呢個位我？不過左右兩邊那些仲慘！完全唔值得賣四佰幾蚊囉！最大問題係點解個場既座位唔係斜上架？我要在人頭
同人頭之間去睇，真係把幾火啦！個台又唔係高喎！唉！好在前面兩個都係女仔者！所以佢地既樣同表情都睇得清楚，我諗後面既觀眾只係好似睇大電視敢咋！



二）個晚都要成二十分左右先開場，我都唔明點解任何藝人既演唱會都係遲開的。張飛寫八點，但八點時入坐的不過一半。敢樣叫人地點開show呀？喂！不如張
飛寫八點半啦！呢Ｄ係咪港人既特性呢？今次又係敢，遲到係咪應該關門大吉呢？就好似在中場休息一樣，開始左約五分鐘仲有人入坐。喂！你唔睇我都想睇架！不
過若果去廁所而排長龍的話，不如開放多Ｄ廁所啦！大家都好急架嘛！仲有中場真係唔該可唔可以唔好賣小食呢？個陣熱狗魚蛋味在我睇show時聞到真係幾大殺
風景架！不過呢Ｄ都係個人喜好者！



三）之前有人提到免費穿梭車到九展場地要等好耐先上到車，我都預早左去搭，大約七點半左右，好易上車又唔駛等，可能已經改善左啦！

講番套話劇先，背景已經變左好多，加入左好多現今既野，好似2008奧運同美女廚房敢啦！仲有ICQ，不過現在已經係face book了。
今次個舞台劇主要講梁寬患了未期高○癌只得番七日命，在個七日內有乜想做就做了。見番舊情人，但又當佢只係水魚。對老婆同個女佢都有所遺憾，所以都想去補償。對老死珍惜個份友情，兩邊插刀。人生快要結束時你又有乜野一定要做架呢？唔好浪費時間了，就好似阿旦將小男人搬上舞台，呢個係佢既一個願望，佢已經達到了。

有部份劇情好似拉得幾長，好似老婆蘇玉華在參加廚藝比賽敢。我都覺得佢背個段好長由拍拖，結婚，生仔，離婚既台詞，好勁！好流利！但係煮左太耐了，有少少過長，點到即止就剛剛好了。就連準備在台下出場既阿旦都企左成五分鐘有多。
同阿旦同蘇玉華坐在一齊聽歌個段真係幾搞笑同感人的，搞笑在阿蘇側頭側左好耐真係郁都唔郁，阿旦想將手抱住阿蘇， 佢Ｄ表情態度真係好掂！好似初拍拖時第一次拖手敢。感人既係阿旦在求天使比番個一日佢，佢得到老婆回心轉意，同個女有機會和好。阿旦講得感人，但阿蘇都聽得感動，我見到佢有淚光。兩位主角真係得得地架！

最開心係Q太郎蔣志光既出場，佢既出場係全場拍手，無論佢平時做好多小人物既角色，佢既演技真係好得，真係冷面笑匠！當三兄弟在K房個場好搞笑，當音樂響起大家都以為蔣志光會唱......我信愛同樣信會失去愛，點知佢又停左唔唱，真係估佢唔到呢！隨即全場又拍手，真係點到即止剛剛好了。
而另一位又做廚藝比賽主持又做梁寬老死大古惑既李思晢表現有些跨張，特別係做比賽主持時，可以角色要係敢啦！就如做天使個位演員一樣，但我就不是太喜愛呢種方式。

仲有舊情人陳法拉，真係只供睇樣睇身材囉！無乜意見！
而三位味之天使都好出鏡。

下次希望會有都市那些日子啦！但唔好呢個場地啦！

神探 (Mad Detective)

神探 (Mad Detective)
導演:    杜琪峰
主演:    劉青雲,安志杰,張兆輝,林家棟,林雪,林熙蕾,李彩寧
片種:    劇情

故事講兩名警員追入樹林捉賊，結果一名警員連人帶槍失蹤，另一名警員平安而回，原因無人知道，其後發生了一連串槍劫案都同呢支失槍有關。後來重案組督察調查左多個月都無結局，於是請來有神探之稱既退休上司幫忙。由於呢個上司查案有獨特見解同方法（睇到人既內心），所以都被認定患上精神病。之前他又真係破到多宗難搞既大案，今次佢又點去解破連人帶槍失蹤和一連串槍劫案呢？

呢套戲係要去思考既戲架！個名改得好好喎！
個個都係好戲之人！家棟真係好有進步呀！青雲就更加掂啦！
究竟我地每個人心中係咪都有隻鬼呢？我相信！
呢隻鬼咪即係我心中既天使同魔鬼囉！佢地專係左右你既決定的。
我好鐘意佢既拍攝手法同剪接，不停將人物同心中既鬼交錯。有時都要諗下那些真？
那些假？有一場他們在一個全黑只有鏡既地方槍戰，拍得幾好睇，連碎左既鏡都見到個七隻鬼。留意最後青雲決定開唔開槍個幕所講既一句話......
人心中可以有好多隻鬼，又可能只得一隻鬼，你估你自己又有冇鬼呢？

黃石至海下周圍行

上次行完大坳門至龍蝦灣之後，今次成員一樣，
地點就係黃石去海下，都係適合我地初哥。
三人食飽飽早餐，便在鑽石山廣場內地下搭96R到黃石總站下車，
之後做下起步既熱身，準備好後開始沿車路行回去大灘巴士站出發。
先入村沿村路行，過了橋後開始上山。

途中有小溪但乾了水的，風景好靚架！
路都好容易行，幾個大細路不停敢影相，真係傻架！但又好好玩喎！

一路沿住海邊行一路聽下歌唱下歌，好開心好舒服，又唔係太曬。

有些村民在屋前都裝飾左聖誕飾物，指示牌寫住去海下都好清楚。

周圍唔多花，但呢度既小型紅樹林真係幾靚。

得閒小吉係度吹番首歌搞下氣氛。
在中途有大石在路中心，我地用不同既方法行過去，
有的推走佢，有的揹走佢，有的爬過去。真係辛苦喇!

不經不覺行左一個鐘，我地到左一個灘後，搵左個靚景便開始開餐了。

今次午餐比上次更跨張，有燒鵝，油雞脾，辣豬耳，芝士條飽，紅提子，
雪梨仲有健康飲品，一路對住海邊野餐真係爽呀！
我同小吉個芝士飽都未食已飽了，雪梨就落山口渴再食。
相又影完，食又食完，兩點幾又要起程了。

我問左由海下個邊黎既人話行左個半鐘左右，你估下我地又行左幾耐？
沿住石灘邊行去上山既梯級，之前個袋就好重，
但現在已經落哂肚了，所以行得都輕鬆！

行經一條山路若果要落既話都危險的，應該幾滑，但我地現在上斜就唔覺囉！
我見到個女仔望到條路都唔知點落，佢個朋友就行先教佢點落。
沿途都有好多人上上落落，大家都應該互相禮讓，
但次次佢地都一樣唔會停下比我地行先（我地人少），
我地都行埋一邊比佢地行，因為我地有禮貌咯！

繼續上山都有好多山景同海景，在遠處見到好多碎石，有些奇型怪狀，
我就無意中發現呢個側面係咪野石？好似人敢(右下角) ！好似在書度見過。

行行下見到呢棵大石，我就停下拉下拉，點知被小吉影左我相。
之後大家都拉下根時，到我影番佢地，佢地又做出高難度動作，非常搞笑。
影完即刻睇番Ｄ相大家都笑到停唔到，從後面來既人都被我地既笑聲嚇到，
拉完根舒服哂又繼續。

有人想打我呀? 等我起飛腳先!
行左一陣又要食朱古力補充一下先!
小吉那棵似唔似聖誕樹呀?

上到最高點時周圍真係好靚架！我地又點會唔停下影番夠本啦！

開始落山時沿途都好靚，有爐仔石，米色個棵好靚，但唔知係乜?

落山時終於見到南風灣了，真係好靚既景好靜既水面。
在途中見到大石，我地又坐下先，小吉又要跳下先，大家仲好似有好多精力敢播。

好靚既南風灣呀!
去到攔路坳時，有分岔路，一邊係去海下，一邊係入營地。
點知有人已話要入營地先，因為佢要去廁所，哈哈！
呢度營地真係無人一樣，個女廁太黑了我唔敢入，之後去左個傷殘廁所。
佢地男廁就好Ｄ，仲有少少太陽照到，若果叫我黎露營，真係要有十幾廿人先好。
但我地到左海下後都見到兩個人話行入黎，兩個人真係勇！

呢個西營地真係好大，加上日落既情景，好浪漫呀！我諗睇星星會好靚的！
大家都好想跑番個圈，放下風箏，剛剛又播放住懷舊英文歌真係好浪漫好掂呀！
但因為開始日落了，我地好去完廁所後便要起程去海下了，無得留低。

行去海下既路線先又要上山，所以原本浪漫既歌聲好唔襯周圍既環境，
即刻停左換歌。行左一陣好在記得仲有個雪梨要食。
途經海洋生物中心和石灰瑤，近到海下時行番石屎路，
大家都覺得唔好行，個地好實好硬。
去到士多都無野食啦！人地都收舖了。
本想行去沙灘睇下個東風響石，但士多老闆都四十五分有車到，
所以我地放棄行去，在村口等小巴出番西貢。
點知等左好耐先有車，早知入去影完相番出來仲有時間，留番下次啦！

各位愛護大自然！

唔該！