又做老泥妹！老泥仔！

事源七一搞左個瘋狂沙灘對對碰，我同小吉，超人負責買丸類同海鮮，前一晚我地食完野就在我家開工。佢地兩個就幫個十三隻帶子刷白淨，超人一路刷就話好核凸，佢話佢平時都唔做呢Ｄ野既！係呀！無計啦！在街度食無人會幫你刷到咁白淨架！但自己食梗係要乾乾淨淨啦！

我就清洗好Ｄ丸丸，都有八十幾粒架！好彩有兩款白魚蛋同炸魚蛋叫左悶蛋幫手買者！原來大家係丸怪！之後就開始整墨魚仔，我都係第一次整乍！然後就開始開貴妃蚌，真係好大隻架！我開左一隻後佢地已經刷好左Ｄ帶子了，之後超人仲發現左個好容易既開法，就係一刀切到底，只靠用力係好難開的。於是就交佢地幫我開喇！我就清潔埋Ｄ帶子先！


搞左一輪快11點了，好似做左一輪運動敢，於是大家就落左樓下七仔做左老泥妹！老泥仔！買左罐Jolly Sandy係度飲，嘩！好爽呀！但超人就好似意由未盡，要買個咖哩魚蛋同燒賣先。

嘩！好耐未試過在七仔叮野食了，仲要成11點了！
以前中學時先會在七仔買野叮，我地好鬼死新手添！唔知點叮？之後對住個微波爐，點解無左以前個Ｄ幾多分鐘既字眼既？個職員就話一款就3加3，一款就5加5個。個爐都無個加號？哈哈！搞笑死！原來只係按完3字一次，叮左後再按3字一次就係叫3加3！哈哈！真係娘死呀！

搞左成晚以為會訓得好Ｄ，但我又失眠了！點解次次出去玩既前一晚都係會失眠架呢？有乜好辨法呢？