Blog友一周年聚會 - 嘩嘩嘩！打到黎！

為左慶祝我小雲開左呢個Blog一周年

我就搞左呢次卡通公仔同你放風箏＋野餐既版聚

多謝呢幾個Blog友參加，更多謝你地搞到我個Blog友一周年聚會 - 討論區有多過140既回應，仲係未計我既直接回應。真係估你地唔到！所以唔好睇少你地呢幾個爛玩精，隨時都可以炸爆我個Blog架！哈哈！

之前真係好驚個天會落大雨，影響到我地呢次版聚，搞到我都無覺好訓，成日上網搵下有冇其他地方有得庶頭架呢？但為左玩，我地都決定一切依舊！打死吧就！風雨不改！

六月一日一朝早六點幾仲落著大雨，心諗唔係嘛！版聚先黎落雨？
好彩！到左出門時就無落雨了，更加感謝既係成日到無落雨喎！又唔係好勁太陽！真係唔該哂！

雖然只係一個小小人既版聚，但我地真係好鬼超噪！勁搞笑！
我地著住件卡通公仔衫做記認，在鑽石山地鐵站集合，然後就去百乖買下飲品，但最重要都係其中一個Blog友爛玩精無煮到滷水雞翼尖，所以更要去買番樣野食啦！之後就坐巴士向大坳門出發！

之前在討論區既預言真係發生了，我地在巴士真係噪喧巴巴，所有坐前面既人都不時望下我地，真係頂我地唔順，但無計，我地都唔想架！點忍到唔噪喎！個個都不停口，不停笑。真係無我地付，好彩巴士司機無叫我地落車咋！

到左大坳門，立即行動唔好等喇！開始放風箏！大家準備好未！

第一隻起飛到既係dada同悶蛋既風箏，緊係啦！我話明包去飛得起架嘛！一陣大風將佢地隻風箏吹起左，悶蛋都未捉得佢住，好彩比個亭擋住，否則隻風箏自己走先了，哈哈！

上得最快個隻風箏係灰姑娘既，你唔好唔信，通常第一次放風箏既人都會好快放得起架！佢又係一個例子。dada同悶蛋就越行越後，真擔心佢地會跌倒，好彩梗係無事啦！Babyfai，小吉同我都幫佢地影下相先，之後我同小吉都起飛了。最搞笑係超人隻風箏今次飛唔起，可能佢隻風箏坐得太多人，哈哈！

玩左一輪見佢地都有Ｄ倦！我就拿個搽茶奶凍出黎，比佢地涼下先！

個個都有唔同既食法！點解灰姑娘唔食既？
唔通真係咁難食？點解影到我既？

食完小點後再放多一陣，超人隻風箏終於都飛倒上天了！

小雲，好容易就將風箏放左上天了！
灰姑娘，你睇！你個爛玩精連放風箏都咁懶既？
小吉，知你叻喇！最高又最遠嘛！
超人，好不容易就將風箏放左上天了！
babyfai，你都放到好高喎！
dada，點解你在樓梯放既？
悶蛋，你係度攪乜鬼呀？我就知呢！（見小圖）

大家都得左了！可以收工開餐！
玩既時候特別過得快，不經不覺肚子都餓了，開餐！

開餐喇！知唔知開餐前第一樣野要做乜？唔係洗手，唔係祈禱，而係個個拿部相機出黎！哈哈！咁好食又係各人自己整既，梗係要幫佢地影下相啦！
等我介紹下先：

Babyfai
藍莓芝士蛋糕（好正！好耐無食！Lam Lam 利）
話梅花雕雞翼（好入味！但唔記得左食番粒話梅添！）
dada
粟米水（消暑解渴，有得食又有得飲，唔記得外賣番Ｄ添！）
冰凍蕎麥麵滑滑冷烏冬（我比較鐘意食烏冬多Ｄ，因為前幾日都食左冰凍蕎麥麵）
悶蛋
碎蛋，吞拿魚三文治（可憐既悶蛋要整碎蛋比我地食，但都好好味播！）

超人
燒豬仔脾（外表吸引！加上蒜茸同香草食落都好味，但個個都食淨左Ｄ，點解？因為未熟得哂囉！）
小吉
三色涼伴（嘩！刀法一流啦！條條絲都咁幼，加上花生麻醬都好開胃架！）
灰姑娘
燒鵝（百乖版既燒鵝，大小適中，皮薄肉厚，揀選一流）
小雲
越南春卷（有煙鴨胸，青瓜條，蘿蔔條，都係第一次食煙鴨胸，無人發覺！哈哈！）

仲要切餅添呀！多謝Babyfai為我整既藍莓芝士蛋糕！

再黎番張大合照先！

天氣熱嘛！我同小吉就整左呢Ｄ小禮物比佢地。
每把扇都係佢地自己既公仔架！再加埋佢地個名，真係獨一無二啦！
希望佢地鍾意啦！

按照之前既提意著番件卡通公仔衫代表自己！

之後就諗下有乜野玩啦！估下又係乜？

好靚呀！個吹波波後面o個個人！

右下：集合左大家既藝術細胞！

多謝超人帶來既吹波仔玩意！個個原來都係童心未泯，努力吹呀吹！
之後我將呢個大家既藝術黎作打球，點知出事喇！我地在叫名玩球時，超人大力過頭將佢掉左上樹。就係敢無得玩了！個個跑到氣喘！

之後又玩番Ｄ靜小小既遊戲，但其實我地呢班野邊度會有得靜呢？
玩非洲話事啤，最大罰最少的一個，各人諗左Ｄ刑罰，真係慘喇！好彩有Ｄ罰唔到者！又話要在桌上跳舞，爬樹扮樹熊，跑圈，sit-up，掌上壓，大叫我鐘意男仔女仔，大叫我好靚仔靚女。

你話佢地係咪又傻又痴架？結果係點？自己睇啦！

好彩玩左幾鋪後就準備走人了，因為仲要行番出去先有車搭嘛！

要同babyfai講聲唔好意思先！要你受左傷都要行咁耐！辛苦哂喇！唔好意思呀！
下次搵Ｄ有車直達既地方再玩過！

回程就在荷里活廣場既Pizza Hut食左新出既扭扭Pizza，但我都係鐘意食厚批多Ｄ！

最後不經不覺十點半左右了，大家都要走喇！
玩完一日，
babyfai就行左一日，快Ｄ番去休息下喇！
灰姑娘就要快Ｄ番屋企洗頭，之後就落樓下扮鬼嚇人！
dada同悶蛋就記得要食保嬰丹，唔好驚驚呀！
超人就番屋企訓得落覺喇！唔駛失眠！
小吉同我可安心訓了！

辛苦哂大家呢日玩到傻左又癩左喇！
個口都笑到倦哂！面紋都多左幾條！
個個都話番去要食番兩粒保嬰丹！
真係唔好意思喇！多哂！

如想睇更多既相片, 可到以下小吉既網誌