三月八日 Day 4

哈哈篇 - 哈哈島或叫珊瑚島Coral Island

點解珊瑚島會又叫哈哈島？
因為話有好多珊瑚在水底，好似向住你笑一樣，所以就叫哈哈島了。

哈哈島都好近碼頭，比帝皇島近。都尋日一樣坐快艇出島，大約15至20分。
將近上岸時，心想唔係嘛！我仲同領隊講，就係呢度？帝皇島靚好多喎！
佢話呢度都成廿幾年前已開發，仲點會靚呢？
我開始擔心，我地一陣潛水有冇野睇呢？唔理了！出左去先算啦！

潛水篇 - 有得有失

我同小吉報左出去潛水，有冇牌都要2000b，
都幾貴的，而且玩完後仲覺得呢度Ｄ設施真係幾差！
可能佢地多數比Ｄ初學者玩既關係，當我地準備裝備時都有好多問題。
佢地Ｄ氣樽係打唔夠氣的，好彩我個支有200，
小吉個支都得150，佢咁大氣一定快玩完啦！
之後換左幾支都得150，最後都算，費是浪費時間了，出發！

我同小吉跟住一個小肥DM出去，我地在岸邊先著對Fin就潛落去。
但由於好大浪我又背住個好重既樽，真係有些行唔穩。
結果個DM幫我著，哈哈！真係唔該哂！搞掂好我地岸邊潛出去。

落到去，水唔算太清，3-4M左右，水流有時都幾大的，
所以在踢Fin時都幾倦！
我明白點解佢要比五舊鉛我，平時都只係用三舊鉛個元的。
當遇到大流時，我地要用手來捉住Ｄ石，而隻腳都被水推起架！
要讚下呢個小肥DM，佢都帶我地睇到Ｄ得意野，
有好多為食魚，海參，硬珊瑚，一大一小既海星，海葵，
軟珊瑚同小丑魚，獅子魚等。
小肥DM見到有個沙洞有隻蟹出緊黎，就叫小吉影！
但當小吉影佢時，佢又唔出，激死！
事後小吉話唔知我地叫佢影乜，因為佢睇唔到隻蟹之前出過黎！
哈哈！仲比佢激死！
小肥DM又搭起隻物體，中間有星形的東西，
佢仲整開比我地睇，睇到都有些肉痛，唔好敢對佢啦！

最唔開心係有一段路原本係有好多硬珊瑚，好似鹿角的。
但大多數都死哂了，只見到灰了色的一枝枝，
間中有一枝重見到係啡黃色。
事後問番導遊，佢話因為南亞海嘯後，好多珊瑚都死哂了，Ｄ水係差左。
聽完都幾可惜！所以呢次潛水都可以話幾可惜同感慨。

在回程時，個ＤＭ就掉哂Ｄ麵包比魚食，我仲被Ｄ魚圍困住，
佢叫我拿住片麵包，傻架咩！我拿住，手都被咬到呀！
就係敢我就脫離左呢群為食魚了。
最後個ＤＭ拿住麵包吉袋捉左幾條為食魚。

我地氣樽得番50，要準備上水了，但個ＤＭ仲要我地向前行。
好彩有條繩附助，沿住條繩去，腳都踢到倦，又大流，都好慘架！
好彩上到水面時已經到了沙灘，好快上倒岸。

突然間個ＤＭ比左個袋魚小吉拿上黎。
點解呀？你估做手信咩！一陣比人話點算呀！
我同小吉放低左D裝備後，拿袋魚比太子威同型姐睇。

但影左一兩張相後，我發覺Ｄ魚好似唔郁，於是我即係跑出沙灘放生。
心諗若果死左的話，Ｄ魚既屍體咪在沙灘邊浮下浮下？
人地睇到好可怕架喎！不過我唔理了放落水先，點知....？
Ｄ魚好快敢沖左出去，原來Ｄ魚在詐死？？
不過都好我唔駛做殺魚兇手！安心哂！

嚇人篇 - 自娛自樂

問番太子威同型姐玩左Ｄ乜？點知係無架！我諗緊係悶過頭，
於是我將太子威來一個大變身，果然令大家得到歡樂！

反船篇 - 香蕉船

後來個導遊問我玩唔玩香蕉船，梗係玩啦唔駛錢嘛！
在開始時我地四個加一個當地人會坐船頭（幕後黑手）
佢會同我地一齊駛出去，開船後佢問我地反唔反船，梗係唔反啦！
點知真係轉左一個圈就番來了，玩完都唔覺囉！
之後第二班人上船，好搞笑！一上船就跌番落黎！
上左幾次都唔得，個對夫妻放棄了，隻船都急不及待飛走了。
隻船得番兩個男仔跟個幕後黑手，結果梗係反左船啦！
我睇住個幕後黑手番到來岸邊先反架！
我諗佢唔會在水中心反的，因為費是浪費時間執番你地呀！

天堂篇 - 繼帝皇島後又一清島

玩完後我地又搭番快艇去左個叫天堂島既地方食午餐。