赤柱峽道至黃泥涌峽道水塘

上星期日我同小吉都係第一次行港島區，之前多數都係行西貢區。
我地好休閒敢食完早餐後再搭6號巴士在衛奕信徑站落車，
做下熱身後開始行了，唔好心急！
原先行程係由赤柱峽道，孖崗山，淺水灣坳，紫羅蘭山，陽明山莊。
現在改左係由赤柱峽道，孖崗山，淺水灣坳，紫羅蘭山徑，黃泥涌峽道水塘（都係陽明山莊附近）。

今次唯一既唔好處係出發前無得去廁所，因為一落巴士就要開始行，四周唔會有廁所。

一開始就要上石級，仲係多過一千級既石級，千其唔好心急，
行下睇下沿途既風景，整個赤柱半島好好靚呀！
終於行完呢段石級，到了赤柱崗既觀景台坐下，
呢度有兩張木椅，我地坐下休息下仲食下蕃茄仔先。
由於被太陽正正敢曬住，望落山又大煙霞，影相都背哂光，
所以坐左一陣又繼續行了。

行完梯級後轉行少少泥路碎石路，先上孖崗山既南峰再去北峰中途有段泥路要小心，
而且都幾費力架！
最搞笑係有段上斜既路我突然行得慢左，小吉問我點解行得咁慢敢？
仲話唔係好難者！我就話上斜唔係難，難在大石同大石既距離都幾高，
我要跨大步，佢腳長就梗係容易啦！
我腳短就要用手扙幫下手，好彩只係小部份者！

在山頂飲左小小飲品充下電，影左小小相就落山了。

沿途果物

不停上上落落敢過左南峰同北峰，遠望仲有一大段山路要行的，
只係完成左孖崗山既路程，遠望就大潭水塘和紫羅蘭山。

我地到左淺水灣坳休息同食野，我地坐在紫崗橋邊既石級。
今次只係帶左牛展，海蜇，無骨鳳爪，豬耳，而蘋果仔同芝士包都未食已飽飽了。
由於中途都無廁所，所以唔敢飲咁多水，真係忍！忍！忍！
食飽飽後影下相，有哂充足既力量上山了。

紫崗橋呢度有條分岔路，西邊去淺水灣南灣，東邊落大潭水塘，
我地就北上向紫羅蘭山出發。
點知上左一段石級又有另一個指示牌，西邊去黃泥涌水塘，直上係衛奕信徑第二段。
我地有些疑問，於是決定問下途人。我問一班人由邊度黎？
佢地話在陽明山莊行過黎的，心諗無死啦！
於是向左水塘方向出發，一開始已經係碎石泥路，越行越唔對路唔似上緊山，
最後發覺我地行既係紫羅蘭山"徑"。

呢條比較平坦易行的，初時開揚仲見到好靚既深水灣。

後來是沿引水道繞住個紫羅蘭山而行，無景可以睇都幾悶的！

唯有向上望啦！

我開始不耐煩敢話比人老點左，小吉只好話:佢地真係陽明山莊行過黎架喎！
我知但我只是有些心心不忿，又嬲自己唔拿資料出來再睇者！

終於行完呢條紫羅蘭山"徑"，在路口有指示話呢段係紫羅蘭山徑，上紫羅蘭山的是右邊另一條路。最後我地行落去黃泥涌水塘，便完成今次既行程了。

天呀！經過我再番查後，在分岔路西邊去黃泥涌水塘是一條平坦既紫羅蘭山徑，直上係衛奕信徑第二段是真的行上山頂崎嶇的山路，兩條路最後都可去陽明山莊的。

雖然今次有少許出錯行左平坦既紫羅蘭山徑，但我會努力！下次一定上到紫羅蘭山的。下站由黃泥涌水塘，紫羅蘭山，淺水灣坳，大潭中水塘，大潭水塘或大潭篤水塘。唔知又如何呢？