五星級大鼠(Ratatouille)

五星級大鼠(Ratatouille)
導演: 畢貝特(Brad Bird)
主演: 粵語配音：鄭中基, 梁漢文, 張柏芝
片種: 動畫


今日終於買到飛睇呢套動畫了, 唔駛同學生爭. 哈哈! 之前成日都爆滿.
今次係Disney同Pixar第一次合作既動畫, 其實我覺得d公仔唔係好靚唔得意,
人物既表情唔夠生動, 超人特工個仔d表情仲生鬼. (可能先入為主)
但佢畫動物d毛髲就仍然出色. 睇得最開心係整野食, 好搞笑!
整套戲都無乜冷場, 老鼠仔最搞笑! 但其實都幾有影射呀!
睇個名都知啦！五星級大廚？五星級大鼠先真！

故事一開始就交代出主角老鼠仔天生對食好咀刁, 成日偷入老婆婆家睇電視, (睇廚神,佢係廚神既粉絲)
有次老鼠仔同大佬被個老婆婆發現, 而且成群老鼠同樣被發現而狂奔,
終果老鼠仔同家人失散左, 由水渠流到巴黎.
其後老鼠仔入到廚神既餐廳, 眼見打雜闊條麵學人整湯,
老鼠仔睇唔過眼靜雞雞幫佢一把, 結果大受好評. 果然係味王老鼠仔呀!
但後來被總廚發現廚房有老鼠出現，大家捉左佢, 然後叫闊條麵帶走, 唔好比人知.
結果闊條麵同老鼠仔做左Friend, 仲幫佢扮識煮野添! 亦做出好多笑料!
闊條麵既出名令到食評家梵高森都要黎試食, 佢要闊條麵做一款「驚喜」既食物比佢。
點知闊條同老鼠仔鬧左交, 老鼠仔仲嬲到走人, 之後仲帶成群老鼠去偷食.
結果闊條麵同老鼠仔能唔能夠和好呢?
最後闊條麵做左款乜野既菜色比梵高森呢?

結尾食評家既評語, 影射出了整個劇本既信息
老鼠仔係一個好渺小好低下層既角色, 但佢都能夠做出令人叫好既食物，
諷刺的既係什麼食評都要拍門到訪，指定要試闊條麵既廚藝。
巴黎外表係一個好多姿多彩既大都會，但都慣了對出身低微既人有歧視。
不過所指既巴黎，又點只得巴黎呢？
其實各個階層都有佢自己出色既人才, 只要自己去堅持嘗試。