澳門之十條腿(一)

人物: 小雲, 小吉, 太子威少, 小西型姐, 長沙賓妮
出發日期: 7月29日 時間: 9:30 地點: 上環信德中心港澳碼頭
回程日期: 7月30日 時間: 8:30 地點: 澳門碼頭

7月29日
我同小吉一早七點三就起身, 八點左右就到信德中心,
然後就同太子威在澳門街餐廳食早餐, 一路食一路等另外兩位遲到小姐:小西型姐和長沙賓妮.
先黎個早餐D, 係個多油餐飽, 唔知點解個面要掃油, 火腿肥仔通粉, 係指通粉形狀好肥大.
飽飽後, 仲可以搭到早一班船(話9:15船, 但9:35開) 大約10:15到達了.

首先在旅遊局問左一些資料後, 一行五人先參觀澳門漁人碼頭(拍日景), 行下影下參觀下.
由於大家瘋狂敢影相, 連原先諗住在附近找地方食Lunch後才回氹仔格蘭酒店, 結果取消無食到.

14:20 在碼頭坐專車回酒店.
14:35 到酒店取房間後, 諗住追番些時間, 但型姐同賓妮又話出出去買些東西先.
我地只好在酒店再諗下行程等她們.
15:40 我地才搭22號巴士去禮記食雪糕 (荷蘭園大馬路12-12A),
我同太子威和賓妮先來件雪糕三文治, 只得一種三色味, 椰子就最香,
小吉同型姐就叫左杯雪糕紅豆冰, 食完後兼雪糕太少.

然後去參觀國父紀念館 (澳門文第士街1號), 睇下孫中山生前既居所。
原來有好多相片而日常用品都好現代架! 唔係古老石山架!
但不夠五點職員就話夠鐘要關門, 我地被迫走人，不過都影左好多相。

之後又順便行下盧廉若公園 (羅利老馬路與荷蘭園馬路交界處), 叫做到此一遊啦!
呢度除左年紀大既人多, 荷花池都多, 但現在過左賞花最好既季節, 下次請先睇下季節啦!

原先諗住食蛋荼, 唔記得左佢夜晚先開. 於是向三盞燈出發.

17:30 到左先試食成群既魚湯粉, 椰汁咖哩雞麵,
我覺得魚湯粉原來好似一Pat野敢, 唔係好得. 而椰汁咖哩雞麵就好些, 有椰汁味但冇咖哩味.



大家都好似唔係好滿意敢, 於是去了另一間雅香試下.
結果魚湯粉就濃味些但都係一Pat野敢,
椰汁咖哩雞同牛腩麵, 牛腩汁庶左椰汁, 麵就幾好味!
咖哩牛腩薄餅都係冇咖哩味, 薄餅如超市一般.


18:30 一心諗住留肚去到達紅街市食金榮記既辣魚包和奶茶. 咖啡明- 牛扒包和咖啡,
結果都落空因為原來不經不覺已過六點, 下次記緊六點前呀!
最後只好搭番車出去澳門漁人碼頭(拍夜景).

19:15 到達, 先在周圍影下夜景先, 八點左右準備等影火山爆發.
好境不常, 唔係落雨而係話今晚無第二輪火山爆發(旅遊書呃人架!).
員工話五點幾已經爆左了, 但我地心心不忿, 再問下明晚幾點會又有煙花放呀? 佢話無喇! 要到星期四喎!
天啊! 乜d澳門人都咁(姑寒)呀! 我地又再一次落空了.
只好懷著失望既心情, 去等等左好耐既的士(因為我地係五個地頭虫, 要搵五人車係好難)去食晚餐.

21:15 終於到左李康記 (新馬路福隆新街33-37號) 乜都未叫, 先來個$550半份雞煲翅,
填補我地既心靈空虛, 每人都可添食到一次.
之後再叫左幾味, 燒乳鴿都好味, 蝦醬通菜炒牛肉同鯪魚球豆腐煲, 就家常小菜囉!
總括可以一試! 飽飽後, 去完超市買水同小食後搭巴士回酒店.

是日活動完, 晚上活動開始.

話說回到酒店後, 大家沖完涼到三人大房集合, 我同小吉一入內......
天黑黑無開燈(壞左?), 一陣燒濃野味(著左火?), 心知不妙. 型姐, 太子威, 賓妮企哂响周圍,
中間只得……一個閃閃火光既蛋糕. 哈哈! 唔駛咁老土呀! 早知你地有野架喇!
去到又無端端有話出出去買野, 回到酒店大堂個員工又比火柴你地,
一入房又黑媽媽, 你地當我係 LU LU 咩! 我係精零既小雲黎架!
哈哈! 想呃我! 打打打!之不過都好多謝你地既心意! 再一次講多…哂!
之後一路食蛋糕, 一路飲可樂, 嘩! 仲唔肥死咁夜仲食野!

繼續又玩竹籤, 放一札竹籤在桌上, 然後續枝取出, 唔可以整到其他枝竹籤, 每枝有不同分數.
我地之前買左八條腸仔, 一人一條多左三條, 所以諗住羸左就比多一條佢做聽日小食.
我一路都領先, 但型姐後尾取得枝最高分, 最後都不分高低.
因為大家都眼訓無計到分, 但第二日型姐都唔記得拿出來食, 帶左回家, 所以佢應該係羸家.

待續……多謝收睇!!

如有興趣, 請睇睇相簿有其他風景及食物相片.