兩口子好鬼營@貝澳

連續三個星期六出征不利，都係因為天氣唔穩定而取消去。
今次天氣報告話有太陽，我地就立即準備出發！
點知零晨三點幾又落起大雨，心諗又玩我？無理由又取消架？
最後唔理了照常出發！小雲小吉露營日！

由於食物和飲品已經買齊，我同小吉在東涌食完早餐就直接搭3M入貝澳！
黎過呢度兩次露營，今次就第一次兩口子露營！
大家既步伐都平日慢了幾拍，好有放假feeling！哈哈！

中午左右到達營地，人不多，幾好呀！
今次帶左另一個六角營去，小吉開始起營喇！

起營其實好快，但之後起天幕就比較煩。
因為怕夜晚會落雨，所以要整好Ｄ庶好個營！
搞左一輪整好了！真係唔該哂喇小吉！辛苦哂喇！

由於太陽曬倒我地營位既枱桌面，我地就在隔離位煮午餐先，其實係下午餐了！簡簡單單酸辣湯餃子！

後面就係我地既六角營喇！對住個沙灘食野，又唔曬！爽呀！

食飽飽又洗好哂野後，我地就去行下沙灘，影下相，摸下蜆喇！
沙灘頭行到去尾都見到好多小朋友在摸蜆！

夜晚我地又準備打邊爐喇！

煲番個蕃茄粟米蘿蔔湯底先！

本來仲有娃娃菜的，可惜焗黃左，小吉話唔好食喎！
算啦唔緊要，我地仲有咁多野食，
丸類，菇類，肥牛和嚮寧，仲有蒜茸沙茶醬添！

哈哈！第一次露營打邊爐呀！幾爽喎！又唔熱！
個湯幾正！肥牛火鍋！哈哈！

邊食邊睇戲，食到好飽！
抖左一陣就一齊去洗野，當做下運動先！
有兩隻小鬼入侵我地個營呀！

我地仲有甜品呀！不過睇埋套戲先煮喇！
似唔似雪糕呀？又開爐喇！十一點幾先仲食湯丸？

芝麻湯丸，仲要勁薑糖水！正！

三點仲未訓得著呀！Ｄ浪聲好立體聲呀！
我唔知有冇訓到一兩個鐘呢？唉！不過都預左了！

早上八點左右已經有人落水玩！我在營內影番出去的！

果然係背山面海呀！

十點幾起身，然後就準備早餐喇！小吉要求既一丁麵，加埋幾粒丸仔！
麻油味和咖哩味，好耐無食咖哩味了，正！

當然唔少得整番杯咖啡啦！欠左份報紙者！哈哈！

飽飽去散下步先，其實係八卦下人地者！
好似營幕展敢，最吸引係呢個！
呢個只係食野同玩既營，訓就在隔離營位。
一大班人都好熱鬧呀！仲打麻雀添！

天氣好好，因為無帶防曬，最後都係唔敢落水。
原本下午我地會煮意粉食，但兩點幾仲係飽。
我地睇下戲食下少食，之後就執野！
最後無煮到意粉了，執好哂又懶得再洗！

雖然我地怕整濕條褲，但都試下摸下啦！我得一粒咋！(大果兩粒係假既)

呢Ｄ係我地既小收穫，但係又細又少，所以我地無食到！
另外一大箱蜆係我地隔離營友昨日既收穫，有大有小係咪好勁呢！

當我地準備離開時，隔離既營友就送左Ｄ比我地食添！真係多謝哂喇！
雖然呢度都有蜆摸，但Ｄ蜆有黑沙呀！都係水口好Ｄ！

告別啦！下次再來過喇！

20101127-28兩口子開心營！(上集)