2007 Langkawi 浮羅交怡,吉隆坡五天周圍遊(三)

20070311 Day 3 (有其他相片, 請睇相簿啦)

早餐後我地帶住興奮既心情向Garden Corel出發, 乘專車到碼頭, 車上有其他報左去呢度既人, 到左有飛鷹個碼頭後, 導遊在售票處買票後, 將防水手帶貼好在手上, 再通過商場上船, 都要坐一個鐘架! 在船上我地聽到d導遊同領隊玩估IQ題, 聽到都知佢地真係冇乜娛樂, d IQ題都幾out. 小吉又開始發揮佢既小宇宙, 比左條題目比佢地諗, 結果乜泰同乜安既姐姐都估唔到, 敢就羸左個飛機窗口位坐.

船停左浮台邊後, 所有人都落浮台放下左毛巾, 水等物品後, 我地就去搵好equipment, 十二點左右乘快艇去另一邊小島旁下潛了, 其他團友可玩浮潛, 游水, 坐玻璃船睇下魚仔, 出去睇餵鯊魚仔或自費參加體驗潛水. (事後他們都話玩得時間太短, training + practice).

今次個Dive master係賓仔黎既, 不過佢都好nice, 佢帶住我地八人去潛潛, 初時水都唔係太清, 後來就好清有好多活珊瑚, 龍躉, 獅子魚, 我地帶左個樽入滿麵包, d魚一路食全程都跟住我一路游, 好開心架! 不過當我比個樽小吉拿住時, d魚又好似唔理佢敢, 佢都冇引. 12:45左右上番浮台食Lunch, 我地因為遲上水, 所以有d野食留番比我地d diver. 其實每次我都食唔落野冇胃口, 但唔想一陣冇力, 都食左小小麵同生果, 不過水就飲好多因為好口渴, 食飽後只係同d團友傾左陣又要準備第二個dive了. 都幾趕!

14:00 今次出去船既另一邊, 呢次小吉就非常開心了, 因為佢睇到一大群魚群, 都數唔到有幾多了, 佢開心到游入黃色既魚群中, 但佢一入去d魚就散開, 跟住又游番一起, 都幾好笑. 可惜個相機影得唔清啦! 都幾壯觀架! 當準備上水時, 驚險既事發生了, 我同小吉都不其然見到d野在眼前游過, 但我地只係回望左一眼, dive master就話上水了. 上到快艇我就問小吉頭先個條係唔係鯊魚, 原來佢都見到, 個條鯊魚都有三呎架! 好彩佢只係入一入鏡就掉頭游走, 佢游得都幾休閒架! 驚險既事仲未完, 當我地上左快艇後仲要等另外兩個人時, dive master坐在船頭中間位背住個海, 我就坐佢既右邊, 小吉坐我右邊. 突然我見到有d黑色野在水面游過, 我即刻問小吉見唔見到, 大家都覺得係鯊魚, 我問個dive master佢又話睇唔到, 呢下都算係一個謎.

潛完上水後, 我地趕快敢掉哂d麵包餵魚, (之前派左兩人有一條麵包餵魚), 一陣間就比佢地食哂了!

回酒店沖身休息左一陣, 就同左兩對團友去左間叫做”美真”食海鮮的, 我地叫車出去的, 若叫的士好似要廿蚊.

六個人叫左瀨尿蝦二食, 藥材酒煮同椒鹽, 怪味老虎蝦, 紅燒雞翼, 馬拉炒通菜, 蛋包什菇. 每對150左右

飽飽後佢地就行下超市, 我地就等車接去做Spa, 我地突登留番最後呢晚潛完水先去做, 佢地之前一日做左都話正! 兩人只係555, 先做60分鐘按摩, 再60分鐘磿沙(有d好涼既沙粒+用蕉葉再焗一陣(慢慢熱), 之後再叫你去沖身洗頭+花池浴, (大約廿分鐘不等) 然後再幫你做自選facial+青瓜鋪滿整個面, (非常之清新). 最後足足三個鐘(12:05)先走得. 勁推介Ishan Malaysian Spa,

今晚係嚮浮羅交怡既最後一晚，真係好唔捨得呢度既寧靜，簡單同舒服！其實呢度自己去都好簡單的，但因為四日既Package價錢比起跟團貴好多，所以無辨法啦！

2007 Langkawi 浮羅交怡,吉隆坡五天周圍遊(四)